இஸ்ரேல் மற்றும் ஹமாஸூக்கு இடையிலான போர் கடந்த 7 மாதங்களுக்கும் மேலாக தொடர்கின்ற நிலையில், கடந்த சில நாட்களாக ஹமாஸ் அமைப்பின் கடைசி கோட்டையாக விளங்கும் ரஃபா நகரில் மிகத் தீவிரமாக தாக்குதல்களை நடாத்தி வருகிறது இஸ்ரேல்.

உலக நாடுகள் இந்த தாக்குதலை நிறுத்தக்கோரினாலும் அதனை பொருட்படுத்தாமல் தொடர்ந்தும் தாக்குதல்களை இஸ்ரேல் மேற்கொண்டு வருகின்றது.

இந்த தாக்குதலில் சுமார் 35ஆயிரத்துக்கும் அதிகமான மக்கள் உயிரிழந்துள்ளனர்.

இந்நிலையில் இஸ்ரேலானது, பலஸ்தீனத்தின் மீது தீவிரமான போர் நடவடிக்கையை மேற்கொள்வதாகவும், இஸ்ரேல் இனப்படுகொலையில் ஈடுபடுகிறது என்றும் குற்றச்சாட்டை முன்வைத்து சர்வதேச நீதமன்றத்தை நாடியிருந்தது  தென்னாபிரிக்கா .

ஆனால், இந்த குற்றச்சாட்டுக்களை இஸ்ரேல் மறுத்தது.

இந்நிலையில் இஸ்ரேல் அமைப்பினர் இனப்படுகொலையில் ஈடுபடுகின்றனர் என்ற குற்றச்சாட்டை முன்னிறுத்தி  தென்னாபிரிக்கா தொடுத்துள்ள வழக்கில், இணைவதற்கு அனுமதி கோரி, பலஸ்தீன அதிகாரிகள் சர்வதேச நீதிமன்றத்தில் 'பலஸ்தீன மாநிலம்' சார்பாக விண்ணப்பித்துள்ளனர்.

இதேவேளை சுற்றுலா தளங்களுக்கு பெயர் பெற்ற மாலைத்தீவிற்குள் நுழைய இஸ்ரேலியர்களுக்கு தடை விதிக்கப்பட்டுள்ளது.

காஸாவில் மேற்கொள்ளப்படும் போரைத் தொடர்ந்து மாலைத்தீவு அரசாங்கம் இந்த அறிவிப்பை வெளியிட்டுள்ளது.

அமைச்சரவையின் பரிந்துரையைத் தொடர்ந்து, இஸ்ரேலிய கடவுச்சீட்டுகளுக்கு தடை விதிக்க மாலைத்தீவு ஜனாதிபதி மொஹமட் முய்ஸு முடிவு செய்துள்ளார்.

ஜனாதிபதி அலுவலகத்தில் நடைபெற்ற செய்தியாளர் சந்திப்பில் கலந்துகொண்டு பேசிய உள்நாட்டு பாதுகாப்பு மற்றும் தொழில்நுட்ப அமைச்சர் அலி இஹ்சான் இந்த முடிவை அறிவித்தார்.