இந்திய பிரதமர் நரேந்திர மோடியும், ரஷ்ய ஜனாதிபதி விளாடிமிர் புடினும் 45 நிமிடங்கள் காரில் உரையாடியது உலக அரங்கில் பெரும் கவனத்தை பெற்றுள்ளது.

சீனாவின் டியான்ஜின் நகரில் நடைபெற்ற ஷாங்காய் ஒத்துழைப்பு அமைப்பின் உச்சி மாநாட்டில் இந்திய பிரதமர் நரேந்திர மோடியும், ரஷ்ய ஜனாதிபதி விளாடிமிர் புடினும் சந்தித்துக் கொண்டனர்.

இருநாட்டு தலைவர்களும் புடின் காரில் சுமார் 45 நிமிடங்கள் உரையாடியவாறு பயணித்துள்ளனர்.
 இது இரு நாடுகளுக்கும் இடையிலான வலுவான உறவை எடுத்துக் காட்டுவதாக இந்திய ஊடகங்கள் தெரிவிக்கின்றன.

சந்திப்புக்கு பிறகு, தன்னுடைய எக்ஸ் பக்கத்தில் இது குறித்து கருத்து வெளியிட்டுள்ள இந்திய பிரதமர் நரேந்திர மோடி

“ஜனாதிபதி புடினும் நானும் எங்கள் இருதரப்பு சந்திப்பு நடைபெறும் இடத்திற்கு ஒன்றாகப் பயணித்தோம். புடின் உடனான உரையாடல் எப்போதும் பயனுள்ளது” என தெரிவித்துள்ளார்.

இது குறித்து புடின் செய்தித் தொடர்பாளர் வெளியிட்ட பதிவில், அவர்கள் வீட்டில் இருப்பது போல் உணர்ந்ததால், இருவருக்கும் இடையிலான உரையாடல் தொடர்ந்ததாக தெரிவித்துள்ளார்.

இரு நாட்டு தலைவர்கள் மீது அமெரிக்க ஜனாதிபதி டொனால்ட் டிரம்பின் நேரடி மற்றும் மறைமுக அழுத்தத்திற்கு இந்த சந்திப்பு நிகழ்ந்துள்ளது.

இதில் குறிப்பாக, ரஷ்யாவிடம் இருந்து இந்தியா கச்சா எண்ணெய் மற்றும் ஆயுதங்கள் இறக்குமதி செய்வதை கண்டித்து அமெரிக்கா இந்திய பொருட்கள் மீது 50வீத வரி விதித்து இருப்பது குறிப்பிடத்தக்கது.

மேலும் புடினுடனான சந்திப்பு குறித்து மற்றுமொரு எக்ஸ் பதிவில் கருத்து வெளியிட்ட நரேந்தி மோடி,

டின்ஜினில் நடந்த ஷாங்காய் ஒத்துழைப்பு அமைப்பின் உச்சி மாநாட்டின் ஓரங்கமாக, ஜனாதிபதி புடினுடன் ஒரு சிறப்பான சந்திப்பு நடைபெற்றது. வர்த்தகம், உரங்கள், விண்வெளி, பாதுகாப்பு மற்றும் கலாச்சாரம் உள்ளிட்ட அனைத்து துறைகளிலும் இருதரப்பு ஒத்துழைப்பை மேலும் ஆழப்படுத்துவது குறித்து விவாதிக்கப்பட்டது. உக்ரேன் மோதலை அமைதியான முறையில் தீர்ப்பது உட்பட பிராந்திய மற்றும் உலகளாவிய நிலவரங்கள் குறித்து கருத்துக்கள் பரிமாறப்பட்டன. எங்களின் சிறப்பு மற்றும் தனித்துவமான மூலோபாயக் கூட்டாண்மை, பிராந்திய மற்றும் உலகளாவிய ஸ்திரத்தன்மைக்கு ஒரு முக்கிய தூணாகத் தொடர்கிறது என குறிப்பிட்டுள்ளார்.