தனக்கு எதிராக சர்வதேச பொலிஸ் ஊடாக சிவப்பு அறிவித்தல் வெளியிடுவதைத் தடுக்கும் வகையில் உத்தரவை பிறப்பிக்குமாறு கோரி சலிந்து மல்ஷித எனப்படும் குடு சலிந்து தனது சட்டத்தரணிகள் மூலம் தாக்கல் செய்த ரிட் மனுவை ஜூலை 3 ஆம் திகதிக்கு பரிசீலனைக்கு எடுத்துக்கொள்ள மேல்முறையீட்டு நீதிமன்றம் இன்று (21) தீர்மானித்தது.

இந்த மனு இன்று மேன்முறையீட்டு நீதிமன்றத்தின் பதில் தலைவர் முகமது லபார் தாஹிர் மற்றும் மேன்முறையீட்டு நீதிமன்ற நீதிபதிகள் பிரியந்த பெர்னாண்டோ ஆகியோர் அடங்கிய நீதிமன்ற அமர்வு முன் விசாரணைக்கு எடுத்துக் கொள்ளப்பட்டது.

சட்டமா அதிபர் சார்பில் ஆஜரான மேலதிக சொலிசிட்டர் ஜெனரல் ஷனில் குலரத்ன, நீதிமன்றத்தில் சமர்ப்பணங்களை முன்வைத்து, இந்த மனுவை தொடர்ந்து பராமரிக்க முடியாது என்று சுட்டிக்காட்டினார்.

மனுதாரர் 2023 ஆம் ஆண்டு மடகஸ்கரில் கைது செய்யப்பட்டு, நாட்டுக்கு அழைத்து வரப்பட்டு, பின்னர் தடுத்து வைக்கப்பட்டு விசாரணைக்கு உட்படுத்தப்பட்டதாக மேலதிக சொலிசிட்டர் ஜெனரல் தெரிவித்தார்.

சந்தேக நபர் விடுதலையானதைத் தொடர்ந்து நாட்டை விட்டுத் தப்பிச் சென்றதாகத் தகவல் கிடைத்துள்ளதாகத் தெரிவித்த மேலதிக சொலிசிட்டர் ஜெனரல், நாட்டை விட்டுத் தப்பிச் சென்ற ஒருவரால் அத்தகைய கோரிக்கையை முன்வைக்க முடியாது என்றும் சுட்டிக்காட்டினார்.

மனுதாரர் தரப்பில் ஆஜரான சட்டத்தரணி, தனது கட்சிக்காரர் கைது செய்யப்பட்ட பின்னர் ஒரு வருடம் தடுப்புக் காவலில் வைக்கப்பட்டதாகவும், சுமார் ஏழு மாதங்கள் விளக்கமறியலில் வைக்கப்பட்டதாகவும் நீதிமன்றத்தில் தெரிவித்தார்.

தனது கட்சிக்காரருக்கு எதிராக நேரடி ஆதாரங்கள் எதுவும் இல்லை என்று அரச சட்டத்தரணி தெரிவித்ததை அடுத்து, மேல் நீதிமன்ற நீதிபதி அவரை பிணையில் விடுவிக்க முடிவு செய்ததாகவும் அவர் தெரிவித்தார்.

பின்னர் பல்வேறு நபர்கள் தனது கட்சிக்காரருக்கு பணம் கேட்டு கடுமையான அச்சுறுத்தல் விடுத்ததாகவும், அவர் உயிர் பயத்தால் நாட்டை விட்டு தப்பிச் சென்றதாகவும் சட்டத்தரணி மேலும் குறிப்பிட்டார்.

இரு தரப்பினரும் முன்வைத்த வாதங்களை பரிசீலித்த நீதிமன்ற அமர்வு, சமர்ப்பணங்களை உறுதிப்படுத்த மனுவை ஜூலை 3 ஆம் திகதி விசாரணைக்கு எடுத்துக் கொள்ள உத்தரவிட்டது.