தெஹ்ரான் மற்றும் ஈரானின் பிற பகுதிகளில் ஏவுகணை தாக்குதல்களை தொடங்கியுள்ளோம் என இஸ்ரேலிய விமானப்படை எக்ஸ் பதிவு ஒன்றை வெளியிட்டுள்ளது.

 

ஈரான் - இஸ்ரேலுக்கு இடையிலான தாக்குதல்கள் இன்றுடன் 7ஆவது நாளாக இடம்பெற்று வருகின்றன.  இந்நிலையில், இஸ்ரேல் ஈரான் மீது மேற்கொண்ட தாக்குதல்களில் குறைந்தது 639 பேர் கொல்லப்பட்டுள்ளதாக தகவல்கள் தெரிவிக்கின்றன.


மேலும் மஹ்சா அமீனின் மரணம் தொடர்பாக கடந்த 2022 ஆம் ஆண்டு ஈரானில் நடந்த அரசாங்க எதிர்ப்பு போராட்டங்களின் போது விரிவான உயிரிழப்பு புள்ளிவிவரங்களை வழங்கிய குழுவானது, இஸ்ரேலின் தாக்குதல்களில் இதுவரை கொல்லப்பட்ட மொத்த எண்ணிக்கையில் 263 பொதுமக்களையும் 154 பாதுகாப்புப் படை வீரர்களையும் அடையாளம் கண்டுள்ளதாக தெரிவித்துள்ளது.


நாட்டில் உருவாக்கப்பட்ட ஆதாரங்களின் வலையமைப்புடன் ஒப்பிடும்போது, இறப்பு புள்ளிவிவரங்கள் ஈரானில் உள்ள உள்ளூர் அறிக்கைகளுடன் குறுக்கு சோதனை செய்யப்பட்டதாக குறித்த குழு தெரிவித்துள்ளது.


இஸ்ரேலின் தொடர்ச்சியான தீவிர தாக்குதல்களின் போது ஈரான் வழக்கமான இறப்பு எண்ணிக்கை புள்ளிவிவரங்களை வழங்கவில்லை. அதன் கடைசி புதுப்பிப்பில் இஸ்ரேலிய தாக்குதல்களில் 224 பேர் கொல்லப்பட்டதாகவும், 1,277 பேர் காயமடைந்ததாகவும் மாத்திரமே தெரிவிக்கப்பட்டுள்ளது.


இதனிடையே ஈரானின் கெர்மன்ஷாவில் உள்ள ஒரு இராணுவ தளத்தில் நிறுத்தி வைக்கப்பட்டிருந்த மேலும் மூன்று ஈரானிய AH-1 ஹெலிகொப்டர்களை இஸ்ரேலிய விமானப்படை குண்டுவீசி தாக்கி அழித்ததாக அந்நாட்டு பாதுகாப்பு படை தெரிவித்துள்ளது.


இந்த உலங்கு ஹெலிகொப்டர்கள் ஈரானிய வான்வெளியில் இயங்கும் விமானப்படை விமானங்களை குறிவைக்கும் நோக்கம் கொண்டவை என்று இஸ்ரேல் இராணுவம் தெரிவித்துள்ளது.

  முன்னதாக, கெர்மன்ஷாவில் உள்ள ஒரு தளத்தில் மேலும் ஐந்து ஈரானிய ஹெலிகொப்டர்களை அழித்ததாக ஐடிஎஃப் தெரிவித்திருந்தது.


இதேவேளை இஸ்ரேலிய பாதுகாப்புப் படைகள் தங்கள் ஆளில்லா விமானங்களில் ஒன்று ஈரானில் சுட்டு வீழ்த்தப்பட்டதை உறுதிப்படுத்தியுள்ளன.

ஒரு செயல்பாட்டு நடவடிக்கையின் போது, விமானப்படையால் தொலைதூரத்தில் இயக்கப்படும் ஆளில்லா விமானத்தின் மீது தரையிலிருந்து வான் ஏவுகணைகள் ஏவப்பட்டு தாக்குதல் நடத்தப்பட்டதாக இஸ்ரேல் தெரிவித்துள்ளது