இத்தாலி பாராளுமன்றில் அமைச்சர் ஒருவர் மீது எதிர்க்கட்சி எம்.பி. தாக்குதல் நடத்த முயன்றுள்ளார்.
இதனால் ஏற்பட்ட கைகலப்பில் ஒரு எம்.பி. ஒருவர் படுகாயமடைந்துள்ளார்.
ஐரோப்பிய நாடான இத்தாலியில் பிரதமர் ஜோர்ஜியா மெலானி தலைமையிலான ஆட்சி நடைபெற்று வருகிறது.
அங்கு மாகாணங்களுக்கு சுயாட்சி வழங்குவது குறித்த பிரேரணை பாராளுமன்றத்தில் கொண்டு வரப்பட்டது.
இந்த பிரேரணையை ஆதரித்து பிராந்திய விவகாரங்கள் துறை அமைச்சர் ரொபர்டோ கால்டெரசி கருத்து தெரிவித்தார்.
இதன்போது சபையில் இருந்த எதிரணியில் இந்த பிரேரணை நாட்டில் பிரிவினையை ஏற்படுத்தும் என கூறி கடும் எதிர்ப்பு தெரிவித்தனர்.
மேலும் இந்த பிரேரணையை கைவிட வேண்டும் என கோரி அவர்கள் கத்தி கூச்சலிட்டனர்.
இந்தநிலையில் எதிர்க்கட்சி எம்.பி.யான லியானார்டோ டோனோ தேசியக்கொடியால் ரொபர்டோ கால்டெரசியின் கழுத்தை இறுக்கி தாக்குதல் நடத்த முயன்றார்.
இதனை பார்த்த ஆளுங்கட்சி எம்.பி.க்கள் லியானார்டோவை பிடித்து இழுத்தனர். அப்போது இரு தரப்பினர் இடையே கைகலப்பு ஏற்பட்டது. எனவே ஒருவரையொருவர் மாறிமாறி தாக்கிக்கொண்டனர்.
இதில் எதிர்க்கட்சி எம்.பி. ஒருவர் படுகாயம் அடைந்தார். அவரை அங்கிருந்த பாதுகாவலர்கள் மீட்டு உடனடியாக வைத்தியசாலைக்கு அனுப்பி வைத்துள்ளனர். அங்கு அவருக்கு சிகிச்சை அளிக்கப்பட்டு வருகிறது.
இதற்கிடையே பாராளுமன்றத்தில் தாக்குதல் நடைபெற்ற சம்பவம் அங்குள்ள சமூகவலைதளங்களில் வைரலாக பரவியது.
இத்தாலியில் உலக நாடுகள் பங்கேற்கும் ஜி-7 மாநாடு நடைபெற்று வருகிறது. இந்த சூழ்நிலையில் பாராளுமன்றத்தில் எம்.பி.க்கள் இடையே ஏற்பட்ட மோதல் அங்கு பெரும் பரபரப்பை ஏற்படுத்தி உள்ளது.