ஒன்பிளஸ் நிறுவனத்தின் பிரீமியம் லெவல் ஸ்மார்ட்போன்களான ஒன்பிளஸ் 7, ஒன்பிளஸ் 7டி, ஒன்பிளஸ் 7டி ப்ரோ, ஒன்பிளஸ் 8 (OnePlus 8), ஒன்பிளஸ் 8 ப்ரோ, ஒன்பிளஸ் 8டி ஆகியவற்றின் பயனர்களுக்கு, வாட்ஸ்அப் செயலியில் பிரச்சினை எழுந்துள்ளது. பயனர்கள் தங்களின் வாட்ஸ்அப் கணக்கில் இருந்து, தகவல்களை பரிமாறும் போது, திடீரென செயலி அப்படியே செயலிழந்து நின்றுவிடுவதாக புகார்கள் வந்தது.

இதனை சரிசெய்ய ஒன்பிளஸ் நிறுவனம், ஆக்சிஜன் ஓஎஸ் (OxygenOS) புதிய பதிப்பை வெளியிட்டுள்ளது. ஆக்சிஜன் ஓஎஸ் 11.0.5.1 பதிப்பானது, ஒன்பிளஸ் 7, 7டி, 7டி ப்ரோ ஆகிய ஸ்மார்ட்போன்களுக்கு பொருந்தும் என தெரிவிக்கப்பட்டுள்ளது.

மேலும், ஒன்பிளஸ் 8டி பயனர்களுக்காக ஆக்சிஜன் ஓஎஸ் 11.0.11.11 மேம்பட்ட பதிப்பும், ஒன்பிளஸ் 8, ஒன்பிளஸ் 8 ப்ரோ பயனர்களுக்காக ஆக்சிஜன் ஓஎஸ் 11.0.10.10 என்ற மேம்பட்ட பதிப்பும் வெளியிடப்பட்டுள்ளது. இந்த அப்டேட் மூலம், பயனர்களின் வாட்ஸ்அப் பிரச்னை முடிவுக்கு கொண்டுவரப் பட்டுள்ளதாக ஒன்பிளஸ் நிறுவனம் தெரிவித்துள்ளது.

மேம்பட்ட இந்த புதிய பதிப்புகளில், வாட்ஸ்அப் மட்டுமில்லாமல், சில சிறிய மாற்றங்களையும் ஒன்பிளஸ் செய்துள்ளது. இந்த சிறிய மாற்றங்கள், இலகுவான மாற்றங்களை பயனர்களுக்கு வழங்கும் என்று தெரிவிக்கப்பட்டுள்ளது. ஒன்பிளஸ் ஸ்மார்ட்போனை அப்டேட் செய்ய கீழே கொடுக்கப்பட்டுள்ள வழிமுறைகளை பின்பற்றவும்.

ஒன்பிளஸ் ஸ்மார்ட்போனில் செட்டிங்ஸை திறக்கவும். கீழே ஸ்க்ரோல் செய்து ‘சிஸ்டம்’ஐ தேர்வு செய்யவும். பின்னர் ‘சிஸ்டம் அப்டேட்ஸ்’ஐ கிளிக் செய்யவும். உங்களுக்கான அப்டேட் கொடுக்கப்பட்டிருந்தால், உடனடியாக உங்கள் ஸ்மார்ட்போன் அப்டேட் வேலையைத் தொடங்கும். அப்டேட் முடிந்தவுடன் போனை பவர் ஆப் செய்துவிட்டு மீண்டும் ஆன் செய்யவும்.

வேறொரு முறையாக, கூகுள் ப்ளே ஸ்டோரில் இருந்து ஆக்சிஜன் அப்டேட்டர் செயலியை பதிவிறக்கம் செய்யவேண்டும். பின்னர், அதனை நிறுவிய பின், அதன்மூலம் சாப்ட்வேரை அப்டேட் செய்யலாம்.

சமீபத்தில் ஒன்பிளஸ் நிறுவனம் தனது புதிய பிளாக்‌ஷிப் ஒன்பிளஸ் 9 ஸ்மார்ட்போன் தொகுப்புகளை டெக் சந்தைக்குக் கொண்டுவந்தது. ஆண்ட்ராய்டு 12 இயங்குதளத்துடன் இந்த ஸ்மார்ட்போன் பயனர்களுக்கு கிடைத்தது. தற்போது, நிறுவனம் அடுத்தபடியாக ஒன்பிளஸ் 10 ப்ரோ ஸ்மார்ட்போன்களை ஜனவரி 2022இல் களமிறக்க முனைப்புக்காட்டி வருகிறது. அதற்காக முன்பதிவையும் நிறுவனம் தொடங்கியுள்ளது குறிப்பிடத்தக்கது.